زوجاتني الوليدة
زجل: عبدالله سهلال
كنت ياسيادي بوكوس هاني مرتاح البال
دارت فراسي طن قلت نتزوج شوفو لهبال
ما جيت فين نقلب على بنت لحلال
حتى لقيت الوليدة خطبات لي بنت الخال
قالت دقيقنا فزيتنا نزربو بلا تعطال
جوج جوج من الحاجة كنجبد بلا تسوال
والعرس فالقاعة هاذي ما كانت لي علبال
شلى فلوس خسرت متحسبوش وشلى مال
والشيكات غير كنسني و نفرق والدين تقال
أوملي كلشي بغى فلوسو دارو لي فلمحكمة مقال
مالقيت غير مراتي نحكي ليها علحوال
الساعة تسوفت لي,الحاصول: ماكاين ما يتقال
وليت نقدد فعظامي مرضت وتزاد علي الحال
قلبني الطبيب قال لي ماعندك باس غير الكبدة والطحال
أو عملية ساهلة تقاد ليك القلب هاذ الشي حالو سهال
بلحق قبل ماترجع شوف ليك شي فقيه إيكون عليه التعوال
يزول ليك السم اللي فلمعدة كيقولو عليه التكال
ناري يامي وليت عقوبة بعدما كنت سيد الرجال
ماحيلتي لصحاب لكريدي ما حيلتي للطبيب
ما بقى لي غير مول الفال
واك واك آعباد الله آش داني للجواج ونا ماعندي مال
عيطت عيطة حنينة تهدو ليها الجبال
لقيت لميمة لحنينة عند راسي كتقول لي :
أنت فعار الله آوليدي علال
ثم فرحت وخف علي الحال
حيت غير كنت كنحلم وباقي بوكوس مرتاح البال.
